Við erum alvöru jólasveinar frá ströndum!

Við jólasveinarnir höfum verið til í um 346 ár ef við erum að telja rétt. Upphaflega bjuggum við í stórum helli á Ströndum á Vestfjörðum en nú höfum við fært okkur yfir í Esjuna. Fyrir um 25 árum byrjuðu Skyrgámur og Kjötkrókur að mæta á jólaböll til að skemmta bæði börnum og fullorðnum og hafa gert á hverju ári síðan þá.

Á Íslandi hafa því alist upp kynslóðir af börnum sem þekkja gömlu skyrfötuna hans Skyrgáms og hangiketið og krókinn hans Kjötkróks. Síðustu sex árin hafa Askasleikir og Bjúgnakrækir einnig slegist í hópinn, ætíð með troðfullan ask af góðgæti og girnileg bjúgu hangandi í beltinu.

Í gegnum árin höfum við samið mikið af nýjum og skemmtilegum jólasveinalögum til þess að spila á jólaböllum við miklar vinsældir. Okkur þykir rosalega vænt um öll gömlu jólalögin en okkur finnst líka rosalega gaman að geta glatt bæði börn og fullorðna með því að spila ný og spennandi jólasveinalög sem þau hafa aldrei heyrt áður.

Okkur hefur lengi dreymt um að safna þessum lögum saman og gefa þau út á plötu. Við töldum þó alltaf að það væri bara skemmtileg hugmynd sem ætti líklega aldrei eftir að verða að veruleika. En eftir frábæra hvatningu frá vinum og vandamönnum sem og gestum okkar á jólaböllum ákváðum við loks að láta slag standa. Og nú er draumur okkar um að gefa út plötu með öllum nýju jólalögunum okkar búinn að rætast!

Góðir vinir og aðstoðarmenn jólasveinanna til 25 ára eru bræðurnir og Strandamennirnir Ragnar Torfason og Guðbrandur Torfason. Synir þeirra hafa einnig kynnst jólasveinunum mjög vel síðustu 6 árin en það eru þeir Pálmar Ragnarsson og Torfi Guðbrandsson.

Við viljum þakka öllum ykkur sem hafa hlustað á plötuna kærlega fyrir áheyrnina og áhugann. Einnig sendum við kærar kveðjur til allra þeirra fjölmörgu sem aðstoðuðu okkur við að gera plötuna að veruleika.

GLEÐILEG JÓL!